Dobri duh fabrike čokolade i Marina Abramovič izazvali zemljotres na Cetinju?

Misterija je konačno razriješena i svi Cetinjani mogu da odahnu!

Iako je prije neki dan roknula eksplozija na rubu Prijestinice, koja je prijetila da proguta i ono malo nepokradenog kulturnog blaga, mjesta panici nema!

Prema našim izvorima iz Zone sumraka, naravno da nije bilo nikakve eksplozije već je zemljotres izazvao niko drugi do dobri duh čuvene neotvorene fabrike čokolade! Kako nam je dostavljeno na zelenoj ceduljici, dobri duh fabrike čokolade Cetinjem ledbi već neko vrijeme tražeći upotrebnu dozvolu kako bi se konačno skrasio ali mu ministar kulture ne da mira, već ga pušta da luta međuprostorom sna i jave.

U tom prljavom naumu, nesebničnu pomoć dobrom duhu fabrike čokolade je pružila Marina Abramovič, koju je tadašnji gradonačelnik a sadašnji ministar kulture, “zapalio” za stan. Rezignirana Marina je stoga napravila performans eksplozije, koju su mogli da čuju samo Cetinjani, dok je dobri duh fabrike čokolade bio zadužen za pomjeranje tla.

Paklenu ulogu u cijeloj priči imao je Zavod za seizmologiju koji je, poput šprica, jednokratno iskorišćen za ovaj performans koji je uzburkovao duhove i sveto tlo.